Plantun de Prouvènço

Pèr coumpara dos planto d'encò nostre

Potentilla pedata & Crataegus azarolus

Potentilla pedata

Rosaceae

Nom en français : Potentille dressée.

Descripcioun :
Aquéu fragoun que trachis dins li tepiero seco de basso Prouvènço es intermediàri entre lou fragoun-pelous, Potentilla hirta e lou fragoun-dreissa, Potentilla recta. Se n'en destrìo bonodi la fueio : avisas-vous que lou tros dóu mitan ague de 7 à 15 dènt e que descendon pas fin qu'à la baso (fotò). I'a quàuquis estipulo que soun pas entiero peréu.

Usanço :
A bessai li mémis usanço que d'àutri fragoun : lucha contro la cagagno e sarra li car (presènci de tanin).

Port : Erbo
Taio : 15 à 40 cm
Fueio : coumpausado
Tipe bioulougico : Emicriptoufite
Cicle bioulougico : Planto renadivo

Gènre : Potentilla
Famiho : Rosaceae

Ordre : Rosales

Coulour de la flour : Jauno
Petalo : 5
Ø (o loungour) flour : 2 à 3 Cm
Flourido : Printèms

Sòu : Ca
Autour basso e auto : 0 à 800 m
Aparado : Noun
Abriéu à jun

Liò : Roucaio - Tepiero seco - Relarg à jóuinis aubret
Estànci : Mesoumediterran à Subremediterran
Couroulougi : Ouroufito-Sud-Ouèst-Éuropo
Ref. sc. : Potentilla pedata Willd. ex Hornem., 1815 (= Potentilla hirta subsp. pedata (Willd. ex Schltdl.) Holmboe, 1914 )

Argeiroulié

Crataegus azarolus

Rosaceae

Àutri noum : Argeroulié, Poumetié.

Nom en français : Azarolier.

Descripcioun :
L'argeiroulié èro proun planta à passa tèms proche dis oustau. Aro se n'en vèi d'eici, d'eila en ribo de champ e dins lis anciàni sebisso. Es un aubret un pau mai fort que l'acinié amé d'espinasso ; li ramo soun mens sarrado mai pus espesso. Flouris à la debuto de la primo e douno de fru roujo à l'autouno que ié dison lis argeirolo vo poumeleto.

Usanço :
"Qu vau d'argeirolo ?", èro la crido di marchand à Marsiho, coume lou raporto F. Mistral dins lou TdF. Aquéstis argeirolo an un goust que sèmblo un pau lou de la poumo e èron bèn mai manjado à passa tèms qu'à l'ouro d'aro. Es un fru de descurbi tourna-mai. Li fru e li fueio an li mémi prouprieta que l'acinié, estènt riche en anti-óussidant.